कचनकवल गाउँपालिका ५ दिन सम्म सिल

झापा
झापाको कचनकवल गाउँपालिकाका जनप्रतिनिधिसहित सर्वपक्षीय बैठकले सात वटै वडा सिल गर्ने निर्णय गरेको छ । १० जना कोरोना संक्रमित भएसँगै
मङ्गलबार पाँच वटा वडा सिल गर्ने निर्णय गरिएकोमा बुधार पुरै गाउँपालिका जेठ ११ गतेसम्मका लागि सिल गर्ने निर्णय गरेको हो ।

शनिबार भारतको मुम्बइबाट आएका ३३ जनालाई केचना, पाठामारी र घेराबारीस्थित सीमा क्षेत्रबाट उद्धार गरी वडा नम्बर २ मा रहेको पथरिया माध्यमिक विद्यालयको क्वरेन्टीनमा राखेर पीसीआर परीक्षणका लागि कोशी अञ्चल अस्पताल बिराटनगरमा स्वाब सङ्कलन गरी पठाइएको थियो ।

उनीहरूमध्ये सोमबार साँझ एक २३ वर्षीय युवामा कोरोना संक्रमण पुष्टि भएको थियो भने मंगलबार थप नौ जनामा पुष्टि भएको थियो ।

अहिले गाउँपालिकामा छिमेकी स्थानीय तहबाट पनि कसैलाई प्रवेश गर्न दिइएको छैन। सम्पूर्ण पसलहरू पनि बन्द गरिएको छ । अति आवश्यक सवारीसाधन बाहेक मोटरसाइकल समेत बन्द गरेको गाउँपालिकाले जनाएको छ । सिल गराउनेमा स्थानीय प्रहरी प्रशासन र राजनीतिक दलहरूले पनि सहयोग गरेको छ ।
हाल गाउँपालिकाका क्वारेन्टाइनमा १६५ जना बसेका छन् ।