सुधारको लय लिंदै सेयर बजार: लगानीकर्ता ‘पर्ख र हेर’ को अवस्थामा

काठमाडौं । लामो समयको उतारचढावपछि सेयर बजारले सुधारको निरन्तरताको संकेत गर्दै बन्द भएको छ । आइतबार नेप्से परिसूचक सामान्य अंकले उकालो लागेको छ । शुरुदेखि निरन्तर उकालो गति लिएर ९ अंकभन्दा माथिसम्म पुगेको नेप्से अन्तिमतिर भने सामान्य १.३५ अंकले उकालो लाग्दा १२१९.८१ अंकमा पुगेर अडिएको छ । यसैगरी क वर्गका कम्पनीको सूचक मापन गर्ने सेन्सेटिभ इन्डेक्स पनि ०.२९ अंकले उकालो लागेर २५६.०४ मा पुगेर अडिएको छ ।

आइतबार पूँजी बजारको ट्रेण्डलाई हेर्दा लगानीकर्ताको मनोविज्ञानमा सुधार हुन भने सकेको छैन । घट्दो बजारमा अधिकांश लगानीकर्ताको सोचाई पनि ‘पर्ख र हेर’ को अवस्था देखिएको छ । माग र आपूर्तिबीच तारतम्य मिल्न नसक्दा बजार अपेक्षाकृत रुपमा अगाडि बढ्न भने सकेको छैन ।

आइतबार १६७ कम्पनीका सात लाख ५० हजार ९२६ कित्ता सेयर २० करोड ९३ लाख रुपियाँ बराबरको सेयर खरिद बिक्री भएका छन् । अघिल्लो साता बन्द हुँदा परिसूचक बढेपनि कारोबार रकममा भने गिरावट आएको थियो । दिनभरमा १६३ वटा कम्पनीको छ लाख २३ हजार दुई सय ११ कित्ता सेयर तीन हजार पाँच सय १३ पटक खरिदबिक्री हुँदा १९ करोड ६६ लाख १४ हजार एक सय ५२ रुपियाँको कारोबार भएको थियो । कुनै पनि कम्पनीको कारोबार करोड पुग्न सकेको थिएन ।

कारोबारमा आएका नौं उप समूह मध्ये पाँच समुह उकालो लागेका छन् भने चार समुह ओरालो लागेका छन् । बीमा समुहको सूचक २२.९२ अंक, उत्पादनमूलक समुह १२ अंकले उकालो लागेको हो । बैंकिङ विकास बैंक र फाइनान्समा पनि समान्य सुधार आएको छ । आइतबार सबैभन्दा धेरै हाइड्रोपावर समूहको ७.३७ अंकले ओरालो लागेको छ भने होटल, अन्य र लघुवित्त समूहको सूचकमा समान्य ओरालो लागेका छन् ।

सबैभन्दा बढि दुई करोड रुपियाँ बराबरको नेशनल लाइफ इन्स्योरेन्स कम्पनीको संस्थापक सेयर कारोबार भएको छ । ओम डेभलपमेन्ट बैंक, कामना सेवा बैंकको संस्थापक, नेको इन्स्योरेन्स र एभरेष्ट बैंकको पनि धेरै कारोबार गर्ने कम्पनीका रुपमा दर्ज भएका छन् ।

आइतबार आरम्भ माइक्रोफाइनान्सका शेयरधनीले सबैभन्दा बढि ६.८३ प्रतिशतले नाफा कमाएका छन् । जेविल्स् फाइनान्स, सूर्या लाईफ र नबिल इक्वीटी फण्डका इकाइधनीको सेयरमूल्य पनि ४ प्रतिशत बढीले बढेको छ ।