स्कूलकी प्रिन्सिपललाई कोरोना लागेपछि धरानमा होहल्ला

धरान
एक महिलामा कोरोना संक्रमण देखिएपछि धरान बजारबासीमा सन्नाटा छाएको छ । शिक्षण क्षेत्रमा आबद्ध ती महिला तीन महिना अघि भारतको दिल्ली गएर आएकी बताइएको छ ।

उनका श्रीमानमा आन्द्राको क्यान्सर भएकाले उपचारका लागि परिवारै लामो समय दिल्ली बसेको थिए । तीन महिना अघि फर्किएर धरान बाहिर कहीँ कतै नगएको तर तरकारी किनमेलका लागि घर नजिकैको तरकारी पसलमा भने गएको उनले बताएकी छिन् ।

श्रीमानको फलोअपका लागि काठमाडौँ जान भनेर प्रतिष्ठानको ओपिडीमा गएर स्वास्थ्य परीक्षण गरेका थिए । दुवै जनाको स्वास्थ्य परीक्षण गर्दा श्रीमतीको कोरोना पोजेटिभ र श्रीमानको रिपोर्ट नेगेटिभ आएको बताइएको छ ।

उनी धरानको एक निजी विद्यालयको प्रिन्सिपल रहेको पनि खुलेको छ ।

लकडाउन यता उनी आफ्नो विद्यालयमा नगएको र अरू शिक्षक र विद्यार्थीसँग भेटघाट नभएको एक शिक्षकले जनाए पनि १३ नं. वडाका अध्यक्ष नेत्र काफ्लेले भने उनी केही दिन अघि विद्यालयको होस्टेलमा चामल पुरयाउन गएको जानकारी दिएको बताए । वडाध्यक्ष काफ्लेका अनुसार संक्रमित महिला दुई आमाजूको परिवारमा आउजाउ गर्ने, घर नजिकैको तरकारी पसले, दूध बेच्ने, मोटरसाईकलमा सब्जी डुलाउने र घरमा भाडामा बस्नेसँग प्रत्यक्ष सम्पर्कमा रहेको चर्चा छ ।

संक्रमितलाई बीपी कोइराला स्वास्थ्य विज्ञान प्रतिष्ठानको कोभिड १९ अस्पतालमा राखिने बताइएको छ । धरानको सिरान शिवधाराबासी ती महिलामा संक्रमण देखिएपछि अहिले संक्रमितको घर आसपासको क्षेत्र शिव धारा चौक देखि धनकुटे रोड निस्किने बाटो धनकुटे रोड सम्म सिल गरिएको हाम्रा सहयोगि लम्जेल संघर्षशीलले बताएका छन ।