नेपाली गाडीलाई भारत प्रवेशमा सहजता

नेपाल–भारत मोटर भेहिकल सम्झौता अन्तर्गत संयुक्त कार्य समूहबिच नयाँ दिल्लीमा भएको सहमति अनुसार अब नेपाली नम्बर प्लेटका गाडी सजिलै भारत प्रवेश गर्न पाउने भएका छन् । सन् २०१४ मा भएको नेपाल–भारत मोटर भेहिकल सम्झौता अनुसार संयुक्त कार्य समूहको बैठकमा उक्त सहमति भएको हो ।

विगतमा भारतीय नम्बर प्लेटका सवारी साधन भन्सार विन्दुमा न्यूनतम शुल्क तिरेर सामान्य प्रक्रिया पछि सहजै नेपाल प्रवेश पाउथे तर नेपाली सवारी साधन भारत प्रवेश हुँदा लामो र अति नै झञ्झटिलो प्रक्रिया पुरा गर्नु पर्ने थियो । नेपाली सवारी साधानहरुले भारतीय दूतावास अथवा विरगञ्जस्थित भारतीय कार्यालयबाट पूर्वअनुमति लिनुपर्ने साथै लामो कागजी प्रक्रिया पु¥याउनु पर्ने बाध्यता थियो ।

यस्तै नेपाल र भारतबीच हाल सञ्चानमा रहेका अन्तरदेशीय बस सेवा अन्तर्गत जनकपुर अयोध्या रुटलाई समेत औपचारिक रुपमा समावेश गर्ने निर्णय समेत भएको छ । यसबाहेक हाल सञ्चालनमा रहेका रुटहरुलाई थप व्यवस्थित र सहज बनाउन बिभिन्न पक्षमाथि छलफल भएको छ । दिल्लीमा सम्पन्न बैंठकमा नेपालका तर्फबाट भौतिक पूर्वाधार तथा यातायात मन्त्रालयका सहसचिव केशव कुमार शर्मा र भारतको तर्फबाट सडक परिवहन तथा राजमार्ग मन्त्रालयकी सहसचिव लिना नन्दनले नेतृत्व गरेकी थिइन् ।