कारोबार रकम र सूचक दुबै नै ओरालो

काठमाडौं । लगातार ओरालो लाग्ने क्रममा लगानीकर्ताको मनोवैज्ञानिक लाइनभन्दा तल पुगेको यो साताको सेयर बजारमा कारोबार रकम र सूचक दुबै नै ओरालो लागेको छ । यस साता १८६ कम्पनीको एक अर्ब चार करोड १६ लाख २३ हजार रुपियाँ बराबरको सेयर खरिदबिक्री भएको छ । यो खरिदबिक्री अघिल्लो साता भन्दा कारोबार रकम ७.२५ प्रतिशत कम हो ।

गत साता १९० कम्पनीहरुको कारोबार भएको थियो । जस अनुसार १७२२८ कारोबारबाट एक अर्ब १२ करोड ३१ लाख एक हजार रुपियाँ बराबरका ४९ लाख ६१ हजार ११० कित्ता सेयर खरिद बिक्री भएका थिए । साताको नेप्से परिसूचक पहिलो दिनको तुलनामा २१.२७ अंकले घटेर अन्तिम दिन ११९८.५४ अंकमा पुगेको छ ।

‘क’ वर्गका कम्पनीहरुको कारोबार मापन गर्ने सेन्सेटिभ परिसूचक पहिलो दिनको तुलनामा ३.९५ अंकले घटेर २५२.०९ अंकमा आईपुगेको छ । यस साता कारोबार रकम चार करोड १५ लाख ४० हजार रुपियाँको आधारमा मेगा बैंक नेपाल लिमिटेड अग्रस्थानमा रहेको छ । त्यसैगरी कारोबार भएको सेयर संख्या दुई लाख ३६ हजार कित्ता र कारोबार संख्या ९९६ वटाको आधारमा पनि मेगा बैंक नेपाल लिमिटेड अग्रस्थानमा रहेको छ ।

यस साता सूचिकरणतर्फ नेपाल ल्यूब आयल लिमिटेडको ६५५०३ कित्ता बाोनस सेयर र निर्धन उत्थान लघुवित्त वित्तीय संस्था लिमिटेडको ४००१६५० कित्ता हकप्रद सेयर सूचीकृत भएको छ । नियमित कारोबारका लागि पाँच दिन खुला रहेको यस साता नेपाल स्टक एक्सचेन्जको कारोबार कक्षमा ऋणपत्रतर्फ संस्थागत तथा सरकारी ऋणपत्रहरुको कुनै पनि कारोबार भएन ।

घटेरै बन्द भएको नेप्से परिसूचक बिहीबार ०.८८ अंकले ओरालो लागेर ११९८.५४ अंकमा पुगेर अडिएको थियो । यसैगरी, क वर्गका कम्पनीको सूचक मापन गर्ने सेन्सेटिभ इन्डेक्स पनि ०.१२ अंकले ओरालो लागेर २५२.०९ अंकमा पुगेर अडिएको थियो ।

निरन्तर गिरावटकै क्रममा रहेको सेयर बजार बुधबार थामिएको थियो । तर पनि लगानीकर्ताको मनोवैज्ञानिक लाइनभन्दा माथि आउन सकेको थिएन । लामो समयपछि सेयर बजार १२ सयको विन्दुबाट पनि तल ओर्लेर एक हजार एक सयको लाइनमा पुगेको बजारमा बुधबार केही सुधार देखिएको थियो ।

बैंकहरुले निक्षेपको ब्याजदर बढाउन गरेको प्रतिस्पर्धाले कर्जाको ब्याजदर बढ्ने त्रासमा बसेका लगानीकर्तालाई बैंकरहरुको सहमतिले केही भरोसा दिएको छ । बैकर्स संघको बैठकले साधारण बचतमा सात प्रतिशत तथा मुद्दती निक्षेपमा ११ प्रतिशतभन्दा धेरै ब्याज नदिने सहमति गरेको थियो । यसअघिको सहमति खारेज भएपछि बैंकहरुले साधारण बचतमा आठ प्रतिशत बढी र मुद्दती निक्षेपमा साढे बाह्र प्रतिशतसम्म ब्याजदरमा निक्षेप उठाएका थिए ।

निक्षेपको ब्याजदर नबढ्ने भएपछि कर्जाको ब्याज पनि नबढ्ने आशामा लगानीकर्ता देखिए पनि सेयर बजारले त्यो लयलाई पछ्याएको छैन । मौद्रिक नीति जारी गर्ने मिति नजिकिदै जाँदा समग्र सेयरबजार र ब्याजदरको विषयमा राष्ट्र बैंकको नीति के हुने भन्ने अन्योल लगानीकर्तामा छ । पछिल्ला दिनमा सेयर बजारको ट्रेण्डलाई हेर्दा लगानीकर्ताको मनोविज्ञानमा सुधार हुन सकेको छैन भने घट्दो बजारमा अधिकांश लगानीकर्ताको सोचाई ‘पर्ख र हेर’ को अवस्थामा छ ।

सर्वाधिक रकमको कारोबार भएका पाँच कम्पनी

क्र.सं.                    कम्पनीको नाम:                                     कारोबार रकम (रु. दस लाखमा):

१.                            मेगा बैंक नेपाल लिमिटेड                              ४१.५४

२.                           नेपाल इन्भेस्टमेन्ट बैंक लिमिटेड                    ३०.१७

३.                           स्टयन्डर्ड चार्टर्ड बैंक लिमिटेड                        २८.१३

४.                          नविल बैंक लमिटेड संस्थापक                        २७.०३

५.                          एभरेस्ट बैंक लिमिटेड                                    २६.०६