बिर्तामोड १ मा १ करोड रुपैयाँको योजना पारित

बिर्तामोड नगरपालिकाको वडा नम्बर १ ले एक करोड रुपैयाँको योजना पारित गर्दै वडासभा सम्पन्न गरेको छ । आज वडा कार्यालयमा भएको सभामा भौतिक पूर्वाधारतर्फ ९० लाख र प्रवद्र्धनात्मक विकास कार्यक्रमतर्फ १० लाख रुपैयाँको योजना नगरपालिकामा पेस गर्ने निर्णय गरिएको वडा अध्यक्ष अग्निप्रसाद पाण्डेले जानकारी दिनुभयो ।
नगरमा पठाइएको योजनामा वडाका सबै बाटोमा नाला अनिवार्य निर्माण गरिने भएको छ । बाटो बचाउन नाला र प्लम्ब अनिवार्य भएकाले प्राथमिकता दिइएको पाण्डेले बताउनुभयो ।

वडाले भौतिक पूर्वाधार अन्तर्गत नाला निर्माण भइसकेका बाटोमा पेभर्स र कालोपत्रे गर्ने, विपन्न आवास कार्यक्रमलाई निरन्तरता दिने, सहरी स्वास्थ्य केन्द्रलाई स्तरोन्नति गरी स्वास्थ्य चौकी निर्माण गर्ने, ह्युम पाइप विस्थापन गरी बक्स स्ल्याब निर्माण गर्ने योजना बनाइएको वडा सचिव टिका अधिकारीले जानकारी दिनुभयो ।
त्यस्तै, धिमालबस्तीलाई धार्मिक पर्यटकीय क्षेत्रका रुपमा विकास गर्ने, पञ्चकन्या र देवी पञ्चकन्या टोललाई नमुना टोल बनाइने, अदुवा खोलाको तटबन्ध गर्न राज्यका विभिन्न निकायमा बजेटका लागि पहल गर्ने लगायत कृषि, युवा स्वरोजगार कार्यक्रमका लागि बिजेट विनियोजन गरिएको अध्यक्ष पाण्डेले बताउनुभयो ।