मिजार समुदायको क्रिया संस्कार तिन दिन बनाउन सुझाव

 

       बकलौरी /  राज्य र संस्कारको माध्यमबाट छुवाछुत, भेदभाव, शोषण, दमन खेपिरहेको मिजार समुदायको साझा संगठन मिजार समुदाय महासंघ १ नं. प्रदेश समितिले सह–कोषाध्यक्ष राजु रोक्काका मामा ससुरा गोपाल मंग्रातीको निधन भएको छैठौ दिन घरैमा पुगेर श्रद्धाञ्जली कार्यक्रम आयोजना गरेको छ ।

        सुनसरीको रामधुनी नगरपालिका ६, इचोलका मंग्रातीको असार २ गते निधन भएको थियो । २०१३ कार्तिक २० गते धनकुटामा जन्मिएका मंग्रातीको लामो समयदेखि सो ठाउमा बसोबास रहदै आएको थियो । ६४ बर्षको उमेरमा निधन भएका मंग्रातीको घरैमा पुगेर असार ७ गते श्रद्धाञ्जली कार्यक्रम गरिएको थियो ।

        उक्त कार्यक्रममा नेपाल साहित्यिक पत्रकार सङघ १ नं. प्रदेश समितिका अध्यक्ष लम्जेल सङघर्षशील, मिजार समुदाय महासंघका महासचिव नविन रम्तेल, सचिव योगेशकुमार सुयल,सह–कोषध्यक्ष   राजु रोक्का, सदस्यहरु टीका लम्जेल, धनबहादुर मंग्राती, कृष्ण मंग्राती लगायतको सहभागिता रहेको थियो ।

        उनको परिवारले ७ दिनमा नै क्रिया संस्कार सक्ने जनाएको छ । सो परिवारको निर्णयले १३ दिनसम्मको लामो र कष्टकर क्रिया संस्कारलाई परिमार्जन गर्न पाठ सिकाउने श्रद्धाञ्जली कार्यक्रममा सहभागीहरुले बताएका छन् । श्रद्धाञ्जली कार्यक्रममा बोल्दै मिजार समुदाय महासंघका महासचिव नविन रम्तेलले सो परिवारको क्रिया संस्कार सबै मिजारहरुले अनुसरण गर्नु पर्ने बताए । उनले मिजार समुदायले क्रिया संस्कारलाई ३ दिन मात्र बनाउनु पर्ने सुझाव दिएका छन् ।

 
        अन्धविश्वासमा जकड्एिको नेपाली समाजलाई बदल्न सो मंग्राती  परिवारको क्रिया संस्कारले नया र सकारात्मक सन्देश दिने बताइएको छ । अहिले आएर मिजार समुदायकै कतिपय बुझने मानिसहरु पनि क्रिया संस्कार रुपान्तरण गर्नुको सट्टा १३ दिनसम्म नै कठोर भएर गरिरहेका छन् । 

          मानिसको मृत्युपछि दाहसंस्कार नै अन्तिम हो । पछिसम्म मानिसको योगदान र सम्झनालाई ताजा राख्न  बार्षिक स्मृति कार्यक्रम आम जनसमुदाय माझ सिर्जनशील बनाएर गदै जानु सन्ततिको महानता हुनेछ । प्रियजनको मृत्युको पिडामा परेका  परिवारजनलाई समाजले समवेदना प्रकट गर्नु मानव सभ्यताको उत्कृष्ठ कार्य हो ।