केबलकार पर्यटन विकासको आकर्षण

प्राकृतिक रुपमा हाम्रो देश निकै धनी छ , नेपाल पर्यटनको धनी देश हो । पर्यटन विकासको लागि धेरै प्रयासहरु भएका छन् । यसमध्ये केबलकार पनि एक हो । आजकाल भौतिक पूर्वाधार तथा यातायात मन्त्रालयमा केबलकार निर्माणका लागि आवेदन दिने क्रम निकै बढेको छ । हाल २५ भन्दा बढी स्थानमा केबलकार निर्माणको लागि आवेदन परेको मन्त्रालयले जनाएको छ । सहज यातायत सञ्जालको विकास तथा विस्तार गर्ने र पर्यटकीय क्षेत्रको प्रवद्र्धन गर्ने लक्ष्यका साथ पछिल्लो समयमा केबलकार निर्माणका लागि चासो व्यक्त गर्दै निर्माणमा जाने समूह तथा लगानीकर्ताहरु बढेका छन् । मन्त्रालयलाई सो को लागि अध्ययन अनुमति दिने कानुनी प्रावधान छ ।

दुर्गम र पहाडी जिल्लामा सडक तथा यातायतको सुविधा नभएका स्थानहरुमा केबलकार उपयुक्त सावित भएको छ । मनकामना दर्शन प्रा.लि.ले मनकामना केबलकार निर्माण गरेपछि नेपालमा केबलकार सञ्चालनको शुरुवात भएको हो । त्यसको धेरै पछि मात्र चन्द्रागिरीमा केबलकार शुरु भएको हो । हाल नेपालका बिभिन्न जिल्लाहरु जस्तै ः दोलखा,पोखरा, ताप्लेजुङ्,ललितपुर, काठमाण्डौं, कास्की, प्युठान, सोलुखुम्बु, डोटी, नुवाकोट, नवलपरासी, इलाममा केबलकार निर्माणका लागि अध्ययन भइरहेका छन् भने कतिपय स्थानमा अध्ययनको लागि स्वीकृति मागिएको छ । यसरी केबलकार निर्माणको लागि आवश्यक सहजीकरणको काम लगानी बोर्डले गरिरहेको छ ।

कतिपय कम्पनीलाई उक्त कार्यको लागि अनुमति समेत दिई सकिएको छ । मन्त्रालयले अध्ययन अनुमति दिने र वातावरणीय प्रभाव मूल्यांकनका लागि मात्रै सहजीकरण गर्दछ । कतिपय कम्पनीहरुको भने सरकारले नीतिगत रुपमा नै प्रष्ट व्यवस्था गरेर सहजीकरण गरिदिनु पर्ने माग रहेको छ । विगतमा संस्कृति पर्यटन तथा नागगरिक उड्डयन मन्त्रालयले केबलकार निर्माणको लागि अनुमति दिने गरेको थियो ।