कोरोनाको जोखिम बढेपछि धरान बजारमा हलचल

धरान
खिलाnatha कोइराला
समुदाय स्तरमा कोरोना पुग्ने जोखिम बढेपछि सर्वपक्षीय बैठक बस्दै धरानमा औषधी र खाद्यान्न तरकारी बाहेक अन्य बजार पसल विहान ९.०० बजेदेखि बेलुका ५.०० बजेसम्म मात्रै खुल्ने भएका छन ।
धरान–१३ का युवामा संक्रमण देखिएपछि सुनसरीका प्रमुख जिल्ला अधिकारी, प्रहरी प्रमुख, चिकित्सक, राजनीतिक दलसहितको सर्वपक्षिय बैठकले सतर्कता अपनाउनको लागी भन्दै ८ घण्टा मात्र बजार पसल खोल्ने निर्णय गरेको धरान उपमहानगरपालिकाका वरिष्ठ प्रशासकीय अधिकृत गणेशप्रसाद खतिवडाले वताए ।
विपि कोइराला स्वास्थ्य विज्ञान प्रतिष्ठान भित्र नै ती यूवालाई संक्रमण भएको भन्ने तथ्य बाहिर आएपछि सर्वपक्षीय बैठकले बजारमा भिडभाड बढेको भन्दै खाद्यान्न, तरकारी र औषधीको पसल सधैँ खुल्ला गर्ने र अन्यलाई बिहान ९.०० बजेदेखि ५.०० बजेसम्म मात्र खोल्न दिइने निर्णय गरेकोे हो । सबै पसलहरुमा सामाजिक दुरी कायम, अनिवार्य मास्क र सेनिटाइजर प्रयोग गर्नुपर्ने लगायतलाई कडाई पनि गरिने भएको छ ।
बैठकले कोरोना संक्रमण भएका विरामी ओसार पासार लागी एम्बुलेन्स र मृत्यु भएकाको शव लैजाने शव वहान व्यवस्थापन गर्न शुक्रबार ११.०० बजे एम्बुलेन्स सञ्चालक र शववाहन चलाउने संस्थाको संयुक्त वैठक बोलाउने तयारी भएको बताइएको छ । सार्वजनिक सवारीहरुलाई सरकारले तोकेको मापदण्ड पुरा गरेर मात्र चलाउन दिने र अनुगमन नियमित गर्ने निर्णय गरेको धरान उपमहानगरपालिकाका वरिष्ठ प्रशासकीय अधिकृत खतिवडाले मकालु टुडेलाई वताएका छन ।