आगलागीमा एकै जनाको ५० लाख क्षति

रामधुनी

धिरेन्द्र कुमार चौधरी

इनरुवामा आइतवार भएको आगलागीमा एकै जनाको ५० लाख सम्म क्षति भएको आगलागी पीडितले बताएका छन् । इनरुवा वडा १ स्थित मुख्य बजारमा विभिन्न पसलहरु सञ्चालन भएको घर सहित अन्य घरहरु भीषण आगलागी बाट क्षतिग्रस्त भएका हुन् । स्थानीय हनुमान अटलको कपडा पसल हनुमान बस्त्रालय बाट आगलागी सुरु भएको बताइएको छ । आगलागी बाट छिमेकी छत्र बहादुर थापाको घरमा ठूलो क्षति पुगेको पीडित थापाले बताए । उनका अनुसार आगलागीमा उनको मात्र ५० लाख रुपया भन्दा बढी मुल्यको घर सहित क्षति भएको छ । उनको घर भाडामा सञ्चालन भैरहको फाइनान्स, रेडिमेट कपडा पसल, टेलरिङ्ग र हारवेयर पसलको बेग्लै क्षति भएको छ ।
आगलागी बाट करोडौं रुपया मुल्यको क्षति भएको अनुमान गरिएपनि क्षतीको एकिन विवरण आउन बाँकी रहेको जिल्ला प्रहरी कार्यालय सुनसरीले जनाएको छ । आगलागीमा हनुमान बस्त्रालयको चार तले घर र कपडा पसलको सामान जलेर नष्ट भएको छ । थपाको घरको माथिल्लो तलामा रहेकोे सिर्जना फाइनान्स र तल्लो तलामा रहेकोे सन्तोषी हारडवेयर, टेलरिङ्ग हाउस जलेर नष्ट भएको छ । बस्त्रालयमा विद्युत सट भइ आगलागी भएको अनुमान गरिएको छ । बिहान ५ बजे सुरु भएको आगलागी दिउँसो ११ बजे नियन्त्रणमा लिइएको थियो । आगलागी नियन्त्रण गर्न इटहरी, धरान, बराहक्षेत्र, बिराटनगर र सप्तरी बाट बारुणयन्त्र आएको थियो । इनरुवा नगरपालिकाको बारुणयन्त्र बिग्रीएर थन्किएको अबस्थामा रहेकोले स्थानीयहरु नगरपालिकाप्रति आक्रोशीत छन् ।