ओली अप्ठ्यारोमा, सत्ता ढाल्न बन्यो यस्तो रणनीति

काठमाडौं, प्रधानमन्त्री केपी शर्मा ओलीले २८ जेठमा संसदमा बोलेको बोली सुनेर उनका समर्थकहरुले हाँसी हाँसी बेन्च ठटाए । कोरोना भाइरसबारे ओलीले गगन थापाको प्रश्नमा दिएको जवाफको तारिफ गर्ने ओलीभक्तहरुमध्ये उनी पक्षका सांसदहरु नै थिए । तर, नेकपाभित्रका ओलीइतरका नेताहरुलाई भने त्यो बोलीले लज्जित बनाएको रहेछ । जुन उनीहरुले आन्तरिक भेटका क्रममा राखेका छन् ।

हिजो नेकपा उपाध्यक्ष बामदेव गौतमको भैंसेपाटीस्थित निवासमा तीन नेताको महत्वपूर्ण कुराकानी भएको छ । गौतम निवासमा वरिष्ठ नेताद्वय झलनाथ खनाल र माधवकुमार नेपाल पुगेका थिए । पूर्व एमालेका ओलीइतरका यी प्रभावशाली नेताहरुले पछिल्लो राजनीतिक घटनाक्रमको समिक्षा मात्र गरेनन् रणनीति समेत बनाएको बुझिएको छ ।

कोरोना भाइरसको रोकथामका लागि सरकारले चालेका कदमको सर्वत्र आलोचना भइरहेको र नेकपालाई दुरगामी नोक्शानी पुगेको विषयमा नेताहरुले गम्भीर मन्थन गरेका थिए । स्वास्थ्य सामाग्री खरिदलगायतको विवादास्पद कदम तत्कालका लागि ओझेलमा परेपनि भविष्यमा त्यसले नेकपालाई असर गर्ने निष्कर्षमा पनि नेताहरु पुगे । ओलीबाट अति भो भन्ने सम्म भएको छ । उनलाई रुसमा कम्युनिस्ट शासन पतन गराउने मिखायल गोर्वाचोभसँग तुलना सम्म गरे ।

नेकपाभित्रका ओलीइतरको समुहबाट ओली संकटमा परिसकेको निष्कर्ष निस्किइसकेको छ । तर, नयाँ नक्शाले ओलीको उचाई बढाएको र सत्ता चलाउँदा उल्टो असर हुनेतर्फ पनि नेताहरु सचेत भएको बुझिएको छ । त्यसैले अब ओलीविरुद्धको गतिलो अस्त्र अमेरिकी च्यालेन्ज कर्पोरेशन एमसीसी नै हुने देखिएको छ ।

एमसीसी कुनै हालतमा यथास्थितिमा पारित गर्न नदिनेमा ओलीइतरका नेताहरु अडान लिएर बसेका छन् । ओली कुनै हालतमा पारित गरेरै छाड्ने अडानमा छन् । सचिवालय र स्थायी कमिटिबाट एमसीसी पारित नहुने निश्चितप्रायः छ । अब ओलीले संसदीय दल या सांसदहरुको स्वविवेकमा छाड्ने गरी प्रस्ताव ल्याउने तयारी गरेका छन् । यसैमा ठुलो रडाको हुने देखिएको छ ।

ओलीइतरका नेताहरु अध्यक्ष पुष्पकमल दाहाल प्रचण्ड र माधवकुमार नेपालले हालै यसबारे छलफल गरिसकेका छन् । पार्टीको नीति र निर्णयविपरित जान नदिने गरी तयारी गरेका छन् । त्यसमा झलनाथ खनाल र बामदेव गौतम पनि सहमत छन् । अब ओलीलाई चारजना हेभिवेटसँग एकसाथ जुध्नुपर्ने हुनसक्छ । पार्टीमा निर्णय नगरी एमसीसीबारे बलमिच्याईं गरेमा सरकारबाट फिर्ता बोलाउन वाध्य पार्ने देखि कारबाहीसम्म गर्नेगरी ओलीइतरका नेताहरुको तयारी भइसकेको बुझिएको छ ।

माहोल पनि ओलीको विपक्षमा बन्दै गएको छ । आर्थिक रुपमा चौपट भएपछि सडकमा असन्तुष्टिका स्वरहरु देखिनथालेको छ । ओलीविरुद्ध जनमत बढ्दै गएको मौकामा केही न केही कदम चाल्ने तयारी समेत भइसकेको छ । फलाम तातेको बेलामा ठोक्नुपर्छ भन्दै मौकाको प्रतिक्षा ओलीविरोधीको छ । त्यसैले एमसीसी पारित गरिसक्नुपर्ने १५ असारभित्र केही न केही हलचल हुने छाँटकाँट देखिदैछ । आफूविरोधी पार्टीका हेभिवेटसँग ओलीलाई यसपटक जुध्न भने हम्मे पर्नसक्छ । कतिपयले दुर्घटनाको खतरा औल्याइसकेका छन् ।