मोरङको कानेपोखरीमा सवारी दुर्घटना हुदाँ ३ को मृत्यु, २ को पहिचान खुलेन

विराटनगर । मोरङको कानेपोखरी गाउँपालिका–७ मा बिहीबारराति भएको दुर्घटना हुदाँ तीन जनाको मृत्यु भएको छ ।
इलाका प्रहरी कार्यालय पथरीका डीएसपी दिलिप गिरीका अनुसार झापाको दमकबाट इटहरीतर्फ आउँदै गरेको बा १४ च ९६४३ नम्बरको स्कोरपिओले ठक्कर दिँदा पैदल यात्री एक महिला र मोटरसाइकलमा सवार दुई पुरुषको मृत्यु भएको हो ।

डीएसपी दिलिप गिरीका अनुसार सुरुमा पैदल यात्री महिलालाई ठक्कर दिएपछि अनियन्त्रित बनेको स्कोरपिओले विपरित दिशाबाट आउँदै गरेको मोटरसाइकललाई पनि ठक्कर दिँदा दुर्घटना भएको अनुसन्धनााको क्रममा खुलेको छ ।
दुर्घटनामा परेर महिलाको घटनास्थलमै मृत्यु भएको छ । अन्दाजी ४०÷४५ वर्षीया उमेर भएकी महिलाको हालसम्म पहिचान खुल्न नसकेको मोरङ प्रहरीले जनाएको छ ।
पैदल यात्री महिलालाई ठक्कर दिए लगत्तै स्कोरपिओले मे १० प २७५६ नम्बरको मोटरसाइकललाई ठक्कर दिएको डीएसपी गिरीले बताए । ठक्करबाट मोटरसाइकल चालक पाँचथरको फिदिम नगरपालिका–२ का अन्दाजी ३८ वर्षीय गजेन्द्रबहादुर गुरुङ र पछाडि सवार अन्दाजी ३५ वर्षीय पहिचान नखुलेका अर्का पुरुषको मृत्यु भएको छ । पहिचान नखुलेका पुरुषको घटनास्थलमै र गुरुङको उपचारका क्रममा नोबेल शिक्षण अस्पताल विराटनगरमा उपचारका क्रममा राति १० बजे मृत्यु प्रहरीले जनाएको छ ।
स्कोरपिओका धनी समेत रहेका चालक सुनसरीको इटहरी उपमहानगरपालिका–४ का ४५ वर्षीय महेन्द्रबहादुर थापालाई कानेपोखरीकै रमाइलोबाट राति १० बजे नियन्त्रणमा लिएर घटनाको अनुसन्धान सुरु गरिएको मोरङ प्रहरीले जनाएको छ ।